സൗഹൃദം

തോളത്തു കൈയ്യിട്ട് തുടങ്ങിയതാണ്, സുഹൃത്തേ!

പ്രണയത്തിനു കാത്തുനിന്നും, കാവലായും...

ചാരായം പകുത്തും, പങ്കുവെച്ചും..

ചായ കുടിച്ചും, കുടിപ്പിച്ചും..
പുക ചുമച്ചും, ചിരിച്ചും..
പക മറന്നും, മറച്ചും...
ഇണങ്ങിയും പിണങ്ങിയും..
അറിഞ്ഞും, പറഞ്ഞും..
കൊണ്ടും, കൊടുത്തും..
...എത്രകാലം ചവുട്ടി തീര്‍ത്തു നാം...
ഇപ്പോഴും, കൊഴിഞ്ഞിട്ടുമില്ല,
കൊഴിയാത്തവ നരച്ചിട്ടുമില്ല...
ദുര്‍മേദസ്സില്ല, രക്ത സമ്മര്‍ദമില്ല..
പ്രമേഹമില്ല, പ്രശ്നങ്ങളില്ല..

ഊന്നുവടികള്‍ വേണ്ട നമുക്ക്
ഈ നരക്കുന്ന ബാക്കി പാതകള്‍  താണ്ടാന്‍
താങ്ങായ്, തളരാത്ത , തണലൊഴിയാത്ത
ബോധി വൃക്ഷം പോലെ തളിര്‍ത്തു നില്‍ക്കുന്നു...

തോളത്തു കൈയ്യിട്ട് തുടങ്ങിയതാണ്, സുഹൃത്തേ!
തോളത്തു തന്നെ തരിച്ചു വെച്ചേക്കു,
തളര്‍ന്ന ദേഹത്ത്
തളരാത്ത സൗഹൃദം!